BEUDOH TAJAK BEUET
(Merantaulah Buat Mengaji)
He aneuk beuet bak sunggoh that, Tuhan peubrat ateueh gata
Tuha muda wajeb meununtut, rayek ngon cut agam ngon dara
Beuet beusunggoh teungoh leubeh, yohgoh susah lepeue kira
‘Ohka rayek lepeue mehmoh, aneuk peurumoh tan beulanja
Yohbu gobboeh pingan gobtroeh, beuet bak sunggoh yoh seunia
‘Ohka susah hate bicah, rupa shurah pueh bicara
Yohgoh baleh bakjeuet LEUBE, beuet beklale jeuep kutika
‘Ohka tuha siteungoh umu, jeuet keu Teungku Ulama Raya
Dalam donya mudah raseuki, dudoe Neubri ngon syuruga
Dalam donya deuh tapandang, nyang le utang ureueng doseuta
Ureueng sulet mit raseuki, dudoe neubri adeueb syeksa
Ureueng ‘alem lagi saleh, keujih leubeh Neubri mulia
Areuta pih le Neubri mudah, Allah tamah soe nyang beuna
Ureueng Malem meungnyo sulet, maken peunyaket meuribee ganda
Lethat gobkheun Teungku kaplat, sulet that2 hanjeuet peucaya
Beuta ingat he aneuk jroh, banlon teuoh tapeucaya
Nyanggot tatueng nyang jeuheuet taboih, tapileh toh nyang jeuet keulaba
Ladom aneuk han sapeue meunyuem, ‘oh takheun dum sang tabri tuba
Han jitupeue saket mangat, han meukeumat rugoe laba
Hana sapeue nyangna hiro, meung teuso-so dijih nyangna
Nyankeu aneuk han sahoroeh, nyangna sunggoh bak meuseunda
Haba nyang got bakjih wayang, aneuk suwang mit bahgia
Gob ‘ibadat jih puwayang, gob seumayang jih peuseunda
Teungku han meuri Leube han meusoe, beurang kasoe nibak jihsa
Nyankeu aneuk paleh hansoe, lam donya nyoe sisen hareuga
Lam akhirat azeueb peudeh, soe peujayeh narit beuna
Geuintat bak Teungku geuyue jakbeuet, taeu ban pheut tumpoi mata
That geuseukok beukah ulee, meunye kreueh kayee kacumeh mata
Adat jitakot keu ureueng tham, jiiem yohnyan hanle haba
Dalam hate tan jimeung ngui, han meung dirui bak bicara
Nyan alamat ureueng paleh, ri nyang tangkeh tan bahgia
Nyang meunurot alamat tuwah, nyang beuhe leupah jih palehna
Ri nyang bantah jihna suwang, sang srang abrang tan bahgia
Ri nyang beu-o jihna malang, ri nyang tungang na cilaka
Ri nyang bakh’om sang seulungku, jiiem laju tan suara
Dawa jaweueb tan sigitu, tunu gob eu ban seulingka
Jidawa tan jipateh han, jiiem meunan sang beulaga
Nyang lonkheun nyan he aneuk jroh, bandum taboih bekbak gata
Taboih nyang jeuheut tatueng nyang jroh, tapileh toh nyang jeuet laba
BAK JEUET BUET JAROE
Lompih aneuk ta meurunoe, puta taloe ngon cop tima
Tarah kayee pih bakna jeuet, ta mupheut ngon taroek rungka
Rante bubee ngon rhat jareng, tableuet gateng tapeugot raga
Bleuet bleuet pade cinu aweuek, peugot turak rawot peusa
Meunan bakjeuet bacut sapeue, pok seuluweue dianeuk dara
Teupin bungkoeh bak meusaneut, lompih bakjeuet gumpoi sutra
Pileh seulapok ngon seumujoe, lom bak raghoe bak lhab sutra
Manyum eumpang ngon criek Iboih, lom bak utoeh manyum tika
Peugot peunajoh pih bak ceudah, bekgob marah dilikot gata
*Cuplikan Kitab Akhbarun Na’im karya Teungku Di Cucum yang bernama asli Syekh Abdussamad. Nazam Akhbarun Na’im ditulis tahun 1269 H.
UDEP BEK KUTO
Dumpeue bak gleh he aneukpo, bekna kuto kalang meuganda
Jan tamaguen pih bak ceudah, jaroe siblah bekna ceuma(r)
Aweuek cinu ngon nyan tamat, toh nyang adat suci jika
Soe nyang ceuma beuta cuco, meunan laku aneuk dara
Cawan pingan lheueh pumajoh, beugot tatroh tatop bakna
Bek ‘iek cicak keunan teulhom, aneuk tagom pat sucika
Ladom jigom bak2 aleue, han jitupeue ka meureula
Batee mupeh ‘ohlheueh mupeh, bekta peu-eh dalam ceuma
Diateueh nang aneuk tapeuduek, top ngon situek bekjeuet ceuma
Cawan pingan seulinteueng meuhat,ateueh teumpat nyangna ceuma
Tutop jitiek beurang kapat, cit ceuma that han jikira
Punggong cawan punggong pingan, jaroe matnyan jeuetkeu ceuma
Jaroe meuligan bekmat bate, ‘ohka suci hanpeue mara
Bineh geupet pihbek tamat, meungnye meuhat jaroe ceuma
Sikin seumeusie lhat bak binteh, bekta peu-eh dalam ceuma
Ladom jitiek bak2 aleue, han jitupeue jeuet keuceuma
Pat nyang suci sinan jeuet gom, bekta som2 ‘ohjan lupa
‘Ohka silab cuco rijang, beksang Dagang baro teuka
Jan tatoeh ‘iek dalam carak, ie tapeuek bak ingat raya
Takot luncat ubak cinu, najih kuto ie nyan dumna
Teutapi nyang got ie tasrah droe, beuta pasoe dalam tima
Tima bakmon taloe panyang, bacut linggang bek meureula
‘Ohlheueh tangui lhat bak cucok, taloe bektok jab bak jiya
Ladom tima tiek bineh mon, taloe meutamon jab bak jia
Tasrah ‘iek ek nyanpi bak jroh, bekmeu roh2 taloe tima
Ek gohlom gleh ielom tacrong, jaroe jab punggong mantong ceuma
Wajeb dilee jaroe tasrah, ie takeubah sikhan tima
Meuka suci jaroe jab ‘iek, lom tareutek jaroe bakna
Meunan bangon hingga suci, banlon kheunkri bek meuriba
Ie nyang tapeuek bak ingat that, nabek luncat dalam tima
Ladom ureueng tueng ie seumayang, ie jigantung rab ngon jiya
‘Oh jileng ie ro bak tanoh, jiya beudoh po nibak pha
Meunan bangon hingga suci, banlon kheunkri bek meuriba
Adat han jipo nibak badan, jab peukayan bajee ija
Kakeuh ceuma najih badan, seumbahyang sinyan han meuguna
Ladom jiple taeu bran-brum, ie luncat dum ban seunlingka
Tayeuen cok ie beuta kaleueng, beklam lubeueng tapeureula
Meungka ceuma punggong tayeuen, najih keuieng kabak gata
Ladom tayeuen gom bak tanoh, nyanpi saboh jeuet keuceuma
Nibak bhah ie ngon bhah najih, nyan beuthat gleh tapareksa
Kareuna peunajoh dum sinaroe, citbuet jaroe ureueng dara
Meungnyo kuto inong pubuet, peunajoh jeuheuet habeh ceuma
Alee muntee beuta keubah, bumeusiblah beklam ceuma
Bekta tiek2 ateueh tanoh, balot bak jroh bumeusaja
Tatroh bakgot bek meuroh-roh, gantung bak jroh taloe dua
Alee pihbek tatop tanoh, dumbek meuroh aneuk dara
Leusong muntee beuna tatoep, bek manok grob jeuet keuceuma
Jitoh ngon ek ateueh leeusong, pueh tasinthong tasrah ceuma
‘Ohjan tasrah sie ngon eungkot, tango patot aneuk dara
Tasrah darah dum beuhabeh, hingga puteh ban simua
Teuma takuet ‘oh gleh darah, sie takeubah keudeh uluwa
Tasrah jaroe cuco beulangong, bek meugandong ie dalamnya
Peusinget beulangong yoh tacuco, ile laju ie u luwa
Lheueh nyan teuma tacuco sie, beuta ple ie sare rata
‘Ohka sare dum ie keunong, boeh lam beulangong suci jika
Sangkira na tatuco lom, meunan bandum bangon sama
Beurang kapeue ta seumeurah, ‘oh seuneuleueh cuco bakna
Ban nyang lonkheun beuta hiro, dumbek kuto aneuk dara
Adatna khanduri meung seugitu, bek roeh Teungku pajoh ceuma
Deesya meuwoe keu ureueng bri, Teungku faki neuthee hana
Bale Tambeh, 18 September 2021 poh 18.10 wib.
( T.A. Sakti )
Bagi yang berminat mendengar langsung bacaan yang merdu nazam ini, dapat menghubungi dua orang ahli baca nazam yang sudah berpengalaman puluhan tahun. Beliau adalah:
1). Tgk. Ismail alias Cut ‘E di Tanjong Dayah, Darussalam, Aceh Besar. Hp aneuk: 085260821604
2). Pak Mukim Abdurrahman( disapa: Pak Mukim ) dengan murid asuhan beliau “MUKI” di Lamceu, Keude Lam Ateuk, Aceh Besar. Hp: 082164830335
Redaksi : Islamic tekhno tv.com
Posting Komentar untuk "NAZAM ACEH SANGGAT BERMAKNA"